الاهـلـي .. وسـر الدقـيـقـة 94 !

اضغط على الصورة لمشاهدتها بأبعادها الحقيقية صالح فاروق . يمرض الأهلي نعم ولكنه لا يموت .. حقا وصدقا هذه الكلمة لم اصدقها ابدا حتي أمس .. كل مرة كنت اقول في نفسي ان الاهلي دائما يفعلها ويفوز في الدقيقة 94 بسبب اننا كذا وبسبب ان لاعبينا كيت .. وان ابو تريكة فايق او ان فلافيو رأسة لا تعرف المستحيل .. الا ان أمس فعلا كل الظروف كانت تلعب ضد الأهلي .. منافس قوي وعنيد هو الاسماعيلي .. ومنافس أخر مش عارف طلعلنا منين هو الجيش ولكلامنا عنه فقرة كاملة .. والاهلي نفسة متذبذب المستوي .. لاعبيه مرهقين ..منهم من كان يلعب وهو مصاب .. هذا ناهيك عن الغيابات .. وضغط عصبي رهيب طوال المباراة امام فرقة يفترض ان من اسمها : الجيش .. سوف تقوم بالهجوم ! ولا تلعب كما رأينا أمس علي طريقة : متبصليش بصة البطريق احنا دفاعنا يجيب موزمبيق ! .. ليس هذا فقط ..بل ان الأمور زادت صعوبة عندما سجل الجيش هدف علي عكس سير المباراة ليضع لاعبي الاهلي تحت ضغط عصبي فظيع .. وتمر الدقيقة تلو الدقيقة .. والاعصاب تشتد أكثر واكثر .. والفرص بالكوم ولا من مسجل ! والنحس يتواصل كما عودتنا كرة القدم في مثل هذه الظروف .. الا ان مشيئة ربنا كتبت علي المجتهد ان يأخذ نصيبه وان يأخذ كل شامت نصيبة برضو ! و كل مدافع ياخد برضو..نصيبه يعني ! .. وكل فاروق جعفر أيضا ! في الدقيقة 94 وفي مشهد هو قمة اليأس تركت المشاهدة و دخلت الي حجرتي وتركت محمود بكر يلملم اوراقه ويشكر السيد اللواء الفلاني علي حسن التنظيم والرئيس علي رعايتة للرياضة المصرية واتحاد الكرة وان كل سنة وانتوا طيبين ..الي هذا الهراء كله كالعادة ! والياس يسيطر علي قلوب المشجعين الاهلاوية الذين جاءوا بالألاف .. والظروف في منتهي الصعوبة كأن الزمن عاد الي قلب استاد رادس حيث موقعة الصفاقسي الشهيرة ! وتخيل الكل .. وأقول الكل هذه المرة ..ان الدقيقة 94 المرة دي مش جاية خلاص ..! الكل .. الا شخص اسمه أحمد فتحي ! لا اعلم شعوري حقا عندما تهادت الكرة تحت اقدام احمد فتحي امام المرمي ... حسيت ان في حاجة هتحصل .. حتي محمود بكر قالها بعد ذلك .ان منظره كان يقول .. : ابعدوا هجيب جول ! توقفت الانفاس تماما حتي الثانية السحرية اياها الثانية 60 من الدقيقة 93 .. الثانية الاولي من 94 لا يتذكر احدا الا صاروخ في المقص الايمن لمرمي الجيش .. وفرحة هستيرية في المدرجات .. واحمد فتحي يجري علي طريقة ابو تريكة في استاد رادس . علي طريقة هداف فرنسا تريزيجيه في الوقت القاتل بنهائي اوروبا 2000 امام ايطاليا علي طريقة رونالدينيو في الدقيقة الاخيرة امام براجا في دوري الابطال علي طريقة انييستا امام تشيلسي في قلب لندن قبل اسبوعين علي طريقة الكبار ! الكبار يمرضون ولا يموتون الكبار لا يخرجون مهزومين ابدا وهم يقاومون الكبار لا يقعون فريسة احد شامت او مفوت او متربص الكبار ان يموتوا فهم يموتون وقوفا .. عفوا يا كل صغير ..فالاهلي فوق الجميع ! * فاروق جعفر : صدقني نحن لو في دولة محترمة .او في اي اتحاد كرة قدم أخر غير اتحاد كرة القدم المصري ..اي اتحاد اخر يحترم نفسه .. لكان تم شطبك نهائي من سجلات المدربين والاندية والرياضة والحياة ايضا ! يكفي تصريحك امس .. بان هدفنا اننا نضيع الدوري عالأهلي ..! لا تعليق فعلا علي هذا التصريح وتصريح حارس مرماك غريب حافظ وهو في منتهي التأثر : ياااه .. كان نفسنا نخلي الاهلي مياخدش الدوري ! وتحرش لاعبيك بالحكم بعد المباراة و الفاظهم وسبهم له وادعاء مدافع فريقك ان محمد ابو تريكة قام بضربه قبل تسجيله الهدف ورميه نفسه ولا الكومبارس داخل منطقة الجزاء .. وحزن لاعبي الاسماعيلي علي ان الاهلي فاز وانهم لسة مفازوش بالدوري زي ما يكونوا هيفوزوا بجنات عدن تجري من تحتها الانهار ... هذا ناهيك عن ان الاسماعيلي كان يلعب بدون جمهور لان عليه عقوبة ( قمة المناخ الكروي الصحي في مصر ! ) في ملعب هو الفساد بعينه مصاب بالقراع والصلع ولا ننسي الاعلام الرياضي بعد المبارتين و كمية الهطل الكوري الرهيب والقئ الفكري المندلق من الافواه في مسرحية هزلية فظيعة .. وشوبير ومرتضي منصور و ممدوح عباس وحسن صقر واتحاد الكرة وزاهر وحسن حمدي وغيرها من المسلسلات ! ثم يحدثونك بعدها عن الرياضة في مصر ..وكيفية تحقيق الاحتراف والكرة ومناخها الصحي وعن ريادتنا الافريقية ! و الوطنية و الانتماء الكروي .. ونبذ التعصب الرياضي وان المنتخب فوق الجميع ! صدقوني لو كسبنا الجزائر بعد ما يحدث ولو تاهلنا لكأس العالم بعد كل ما يحدث في الرياضة المصرية من مهازل ..: يبقي اي شئ تاني ممكن يحصل .. ممكن مصر بقدرة قادر تبقي زي الامارات وان اسرائيل ممكن تطلع من فلسطين وان امريكا تشحت من دول العالم التالت ! وان انا أطلع في البيت بيتك كمان نص ساعة ! * احمد حسن : فقرة كاملة عن احمد حسن .. احمد حسن كابتن منتخب مصر الرهيب ..وكابتن الاهلي العجيب .. و عملاق الكرة المصرية الغريب .. ! بجد والله الواحد ايده وجعته من الكتابة علي أحمد حسن ..! وريقة نشف من الحسبنه علي هذا اللاعب ! نفسي اعرف ايه الميزة ان احمد حسن يلعب كرة قدم في كوكب الأرض اصلا ! احمد حسن امبارح لو مكانش موجود مع الاهلي احنا كنا كسبنا 87531 / صفر ! احمد حسن مفيش ولا تمريرة من رجلة مضبوطة ! احمد حسن كان امام المرمي امبارح ولوحده تماما وسدد الكرة ناحية المدرجات ! احمد حسن اي كرة تخرج من اي لاعب لازم تمر عليه الاول قبل ما تروح للاعب الاخر ! غصب و اقتدار ! احمد حسن بيشوط من اي حتة في الملعب زي ما يكون روبرتو كارلوس بيلعب في الاهلي واحنا مش عارفين ! احمد حسن مش عارف جايب الثقة في نفسه دي كلها منين ! احمد حسن يجيد كل انواع المهارات ويجيد قيادة كل انواع المركبات من الطيارة حتي التوكتوك ! يجيد التحدث بكل لغات العالم ..ويتقن كل فنون التنكر ... ورمزة السري أ- ح – 1 ! انا خايف ليكون هو ادهم صبري وانا معرفش .. واليكم تغطية بالفيديو والصور لما حدث أمس ! : اهداف المباراه من مودرن سبورت وجوم لاعبي الاسماعيلي ملخص من يوتيوب ..جعفر يطالب شوبير بالمنطقية ومكالمة حسام البدري شاهد لحظة تباين مشاعر لاعبي الاهلي والاسماعيلي في الثواني الاخيرة للاسبوع الاخير للدوري. من مصراوي صور المباراة من الموقع الرسمي للأهلي

حبيب نانسي عجرم انضم للمقاومة يا جدعان .. بشري يا أهل غزة !

"تفاعلا منها مع الاحداث السيئة التى تشهدها مدينة غزة هذه الايام من مجازر دموية، قامت نانسى عجرم بالاتفاق مع المخرجة ليلى كنعان على اجراء تعديلات جوهرية على سيناريو كليبها الغنائى الجديد (لمسة ايد) بحيث يظهر الكليب فى شكل مختلف تماما ..

و كان السيناريو القديم للكليب يقتضي بأن تظهر نانسى غاضبة بسبب ابتعاد حبيبها عنها وعدم تقديره بشكل كافي لمشاعرها المتدفقة نحوه بينما في السيناريو الجديد ستظهر فيه سعيدة لكون حبيبها تركها لينضم لفصائل المقاومة ضد جنود الاحتلال فتدعو له هو وكل أقرانه بالانتصار وتظل هي من جانبها تراقب الأحداث وهى فخوره به .."

حضرتك شفت الخبر ده كويس ؟؟!!

طب كمان مرة . :قررت الاخت الأنسة نانسي عجرم قال ايه يا عيني اجراء تعديلات ومش بس كدا لأ دي تعديلات جوهرية علي كليبها الجديد علشان خاطر قلبها الرهيف الحنين اتخنق خالص يا عيني من الضرب في اطفال غزة والدم الي بيشر منهم والواوا الي بتطلعهم بعد كل قصف ,! وستظهر سعيدة والله في الكليب وهي تراقب حبيبها من بعيد عشان طبعا مينفعش نانسي تروح الحرب وتسيبنا – تسيبنا ده بتاع ايه ! – ليجرالها حاجة واحنا مالناش غيرها . وهتكتفي بانها علي حسب الخبر بالنص : (( انها هتبقي فخورة به)) !!

صلاة النبي .. وكمان مش نانسي وبس اللي تفاعلت بقوة وجاهدت مع ثكالي امهات فلسطين المحتلة وغزة التي هي علي خط النار ..

انما كمان هناك الاخت الفاضلة سمية الخشاب راعية الفن الهادف في مصر و خريجة مدرسة الاخلاق الحميدة في الفن

حيث اتحفتنا بتصريح هي كمان بتقول فيه انها قررت تأجيل البومها الغنائي - اه الغنائي حكم سيادتها وصلت للتوب في التمثيل خلاص ده بالاضافة ان صوتها بسم الله ما شاء الله مش بيسبب تلوث سمعي ولا اي حاجة ! – الالبوم الي اسمه .: (( عايزاك كدا )) . وقد اجلته بسبب ظروف الحرب علي غزة .. لاجل ان تتحفهم باغنياتها بعد ان يفوقوا من الي هما فيه !

بعد صلاة النبي لتاني مرة اسمحلي انقل لحضرتك اخر تصريح وهو بمثابة الكريزة الي فوق التورتة بجد يعني مش هزار !

ففي بث مباشر بثته قناة السي ان ان . ووكالة البي بي سي , ورويترز ووكالات انباء اخري عالمية .. ومتابعة عربية اعلامية كبيرة من محطات كالجزيرة والمنار و الفضائيات العربية جمعاء : فقد صرحت قيثارة الشرق وفاتنة الطرب العربي وصوت السماء . السيدة المصونة الغراء ( سميرة سعيد )

بتصريحا تعجب له العلماء في قناة ديسكفري من حيث مضمونه الذي كان غائبا عنا جميعا . ولفتت انظارنا لنقطة هامة ومصيرية في حياة العرب والشرق الأوسط . ! فقد قالت بالنص - امسك اعصابك - :

ان الي بيحصل في غزة ده ......... :

حرام ( !!! )

والله يا مدام سميرة بجد جبتي التايهة و حليتي المعضلة ولفتي نظرنا للمستخبي واللي مكناش واخدين بالنا منه !

لا اله الا الله .

ليه دايما العالم دي بتحسسني انهم عايشين في فيلم كرتون ! وليه دايما مصرين علي اغاظتنا ورفع ضغطنا بكل الطرق المشروعة والغير مشروعة ! وليه دايما بتحاولوا تظهروا في موقف ايجابي وكويس رغم ان الكل عارف انكم اكتر ناس منفصلة عن الواقع ومش حاسين باي فئة من اي نوع في اي حتة في اي دولة !! بداية من الاخ الزعيم عمرو دياب الي غني يوم رأس السنة لحد الاخت كارول سماحة الي غنت في سوريا ليلة المجزرة !!

بجد من كل قلبي بقول .: روحي يا شيخة منك ليها الهي ينزل علي نافوخكوا تلاتة اربعة صواريخ ماركة القسام . منلاقيكوش بعدها رافعين ضغطنا ومعليين حسنا

قادر يا كريم !

المشاهدين الغلبانين .. وتهييس المعلقين ..!!

سؤال بسيط كدا في الاول
بتحب الكورة ؟؟!!
ايوة ؟؟
يبقي أكيد طلع عينك من المعلقين واكيد حاجات في البيت عندك اتكسرت واعصاب عندك باظت من اللي بتسمعه كل مباراة والتانية !

طيب لو اجابتك : لأ مش بحب الكورة ؟!
يبقي بردو أكيد اتعذبت بالمعلقين والي بيعملوه بردو لان اكيد بتقعد مع حد ما بيشوف ماتش مثلا وبينوبك من الحب جانب ..سواء كان والدك او صاحبك او اي حد بيتفرج علي ماتش او جارك مشغل التليفزيون بصوت عالي مثلا واكيد وصلك موجات صوتية سوبر سونيك من داخل الاستاد الي اذن حضرتك مباشرة !

مين الي بيحب الأذي ده :

نفسي اعرف مين المسئول عن اختيار المعلقين للمباريات ..
وهو احنا عملناله ايه علشان يعمل فينا كدا ... ولو حضرتك بتختارلنا المعلق ..مفيش ولا مرة قعدت شفت اداء المعلق ده وشفت بيعمل فينا ايه ؟!.. شئ غريب والله
المعلقين اعزائي ينقسمو لنوعين ..
- معلقين
- وناس تانية نفسها تبقي معلقين ..!
ونفسها تشوف اسمها علي شاشة التليفزيون قبل اي مباراه ولو كانت في دوري المظاليم و هو مكتوب جنبه كلمة :تعليق فلان !
وتعالو نستعرض حبة اسماء من الي كانو بيعذبونا بتعليقاتهم كل يوم والتاني في كل مباراة كرة قدم !
التشكيل مكون من !

مدحت شلبي !! :

اللواء مدحت شلبي له صوت في منتهي الروعة لكن كل ده كوم والكلام الي بيقولة كوم تاني ! " وهاللا هاللا هالللا ..." وينهار ابياااااااااااااد...ياشيكا .. يا مزيكا ...!!
" و النبي .. والنبييييييي .. حرااااااام علييييك !! ..
" وربنا يعلي مراتبك يبني .. " " والله عليك .. يا حبيب والديك" ..

ده طبعا غير الغنا من نوعية اول مرة شفته حبيته ويا اسمر يا اسمراني ..

ومننساش يوم ما فلافيو حط جول في الزمالك وتصادف كان التاريخ يوم عيد ميلاد فلافيو ..فقام السيد اللواء بالغناء : عقبالك يوم ميلادك يا فلافيو ..!! ........... ما علينا !

محمود بكر ..!

السيد محمود بكر اخر ماتش محترم قام بالتعليق عليه هو ماتش مصر وهولندا كأس العام 1990 .. وبعد كدا التهييس بقي بالكيلو في جميع المباريات ! الكلام الغريب الغرابة نفسها .. :
"الولد بيتضحور بالكورة .." !
المباراة كدا معقربة بلغة الكورة " !
شيكل المباراة بدلاً من شكل المبارة !
النادي الحرس الحدود !! ( التلاتة فيهم الف ولام !! )
و كله كوم وانه يشبه اللعيب المشهور والمهاري بناس جد جد جدي نفسه مسمعش عنهم !
مثلا زين الدين زيدان بيرقص واحد ومبهدله يقوم قايللك :

وخده واحدة كدا من بتوع ابو حباجة !! ( حباجة ميييين ده )
يبقي رونالدينيو مقطع واحد من الترقيص تلاقيه قاللك :
والله بيفكرنا بالجماعة بتوع زمان .. الضظوي بقي وسمير كاوتشة !! ( مين سمير كاوتشة ده كمان ؟!!! )

احمد شوبير ..

احمد شوبير مفهوش غلطة .. الا حاجة واحدة بس ! .. انه بينسي انه قدام ميكروفون وكل الناس بتسمعه ..
يعني حتة انه يقوم بتسليك حنجرته دي طول الماتش شغالة ..كل خمس دقايق تقريبا نسمع احمممممممم احممممممم..
احممممم ... كح كح ..حححححح .. وهكذا .. يا باشا ابقي اشرب ينسون .. مفهاش حاجة يعني !

حمادة امام :

صباح الهستريا
تبقي المباراة عااادية جدا وتبقي كمان ضعيفة وطرفيها مش اقويا ..
حتي لو المباراة مثلا كانت بين تليفونات البدرشين و كاوتشات بني سويف .. او الاتصالات ونادي شركة المكرونة مثلا .. تلاقي حمادة امام والكورة لسة عند خط السنتر .: " وحلواااااااااااااه وخطراااااااااااه ... وهوبببااااااااا ..
ومين يقابل ..وياااااااه .. لغاية لما يجيلي هستريا وانا قاعد من الانفعال ولسة النتيجة صفر صفر ..!!

مجدي عبد الغني :

واحد تحس انه بيموت في الحياة وانها بمبي اوي ..ويقعد يضحك طوووول الماتش .. وههههههه وصمويل ايتو ههههههه يباصي لميسي ههههههههه وياااااااه في العارضة ههههههه ..!!! ( في ايه اللي بيضحكك )

وكله كوم وانه اي ضربة جزاء تيجي : يقعد يقارنها بضربة الجزاء الي جابها هو في هولندا في كاس العالم ! ويقعد يقول " ياتري هيحطها ناحية اليمين زي ما أنا حطيتها ولا هيلعبها في اي حتة تانية وتبقي وحشة ؟؟! ( !! )

طارق الادور :

يموت في الكلام الكتير .. ولكنه رغم كدا موسوعة وكمبيوتر في المعلومات الكروية ..وحافظ تاريخ كل اللاعبين من اي فرقة ولو كانت فرقة مطاحن الفيوم .!
يشوف اللعيب ماشي يقولك : " أهو .. عارفينه ده . اهو ده بقي عبده جنايات . بدأ الكورة قبل ميتعلم المشي وكان هداف الدورة الرمضانية ب 12 هدف سنة 66 !! "

معلقين الاي أر تي :

كلهم كدا مع بعض بما فيهم عصام الشوالي .. ورؤوف خليف واشرف شاكر ؟؟ :
كلهم بيصوتوا عامة
كلهم بيصرخوا عامة
كلهم بيخضونا عامة !
كلهم..بيحبو بلدهم جدا وملهمش دعوة بالفرقة التانية عامة ! .. ولا ننسي عصام الشوالي وبكاءه عند تعادل تونس مع الكاميرون في بطولة افريقيا السابقة !
فنداء الي المسئولين عن اختيار المعلقين ...
ارحمونا ..كفاية !!

إمشي يا عمرو ... !

مشكلة اللاعبين المصريين وخاصة المحترفين بالخارج : انهم لا ينظرون الا تحت اقدامهم !

قرأت تصريحا جديدا للنجم عمرو زكي يعتبر دليلا أكيدا علي العبارة السابقة بالحرف ..

فاللاعب يقول انه سيبقي وفيا لنادي ويجان مهما حدث ولو طلبت منه ادارة نادي مانشستر يونايتد التعاقد معه !..
كما قال بالنص :
‏" حتي لو فاتحني ناد آخر في الانضمام إلي صفوفه‏,‏ ستظل رغبتي أن ألعب في ويجان‏,‏ حيث أشعر بالألفة‏,‏ حتي لو كان النادي المهتم بي هو مانشستر يونايتد‏,‏ حيث لا أستطيع أن أصدق مدي تصميم المدرب ستيف بروس وإصراره علي التعاقد معي للعب في صفوف فريقه‏,‏ فقد ظل يسعي إلي ضمي علي مدي ستة أشهر‏,‏ لذلك فانني أريد ان اثبت ولائي له‏,‏"

يعني الكلام ان عمرو زكي مرتبط بويجان الي الابد ..و ما صدقنا طلعنا من مصر واستحملنا انجلترا اهو واتكيفنا عليها حتي ظهرت المشكلة التانية ان عمرو زكي بيعتبر ويجان هو بيته دلوقتي ..!!

لا نعلم الي متي سنظل بتلك الشاعرية الشديدة يا مستر عمرو . الكل يعلم ان الاحتراف بعيد تماما عن اي عواطف او عوامل نفسية .. والمستر ستيف بروس هو اول من سيجعلك تجلس علي مقاعد البدلاء اذا لم يصادفك التوفيق في المباريات القادمة ..
فهو لم يصر علي التعاقد معك كل هذا الوقت الا لكي تكون عاملا مساعدا له في الفوز والظهور بشكل افضل وسط مدربي الدوري الانجليزي !
في عالم الاحتراف تظل كلمة العواطف كلمة مبهمة .بل ليس لها معني

ستيف بروس نفسه كان العام الماضي يدرب ايفرتون وكان يقودة امام ويجان !! ثم ها هو هذا الموسم يلعب امام ايفرتون في الدوري مدربا لويجان !!!

ثم انك يا عمرو في ويجان ومع كامل احترامنا لكل لاعبية الا انهم ليسو بالكفاءة المطلوبة لتوصيلك الي المرمي كل مباراه

وشاهدنا عمرو في اغلب المباريات يصنع الهجمات ويستغل انصاف الفرص بل ان هدف ليفربول الذي يتحدث عنه الجميع كانت العرضية ملعوبة بشكل غاية في السوء وهو بوضع اعجازي قام بتصويبها في الشباك !

الخلاصة ان عمرو زكي سيهدر قدراته في ويجان الذي يحتل المركز ال 14 الان ! والسبب هو حبه المتفاني لويجان !

اخيرا يجب ان تكون لديه خبرة من مشوار لاعب اخر مثل احمد حسام ميدو .. والذي بدأ مع ديدية دروجبا في نفس الفريق ( مرسيليا ) .. ثم تنقل الي روما ثم سلتا فيجو ثم توتنهام ثم ميدلسبرة في الوقت الذي اصبح فيه دروجبا اساسيا مع تشيلسي الي الان ..! فهي دعوة له ليحسن الاختيار والا يظلم نفسه وان يضع قدراته في المكان الصحيح ..

لذلك فالشعار المطلوب في المرحلة القادمة ليس الولاء والحب والانتماء .. لان تلك كرة قدم وليست بطولات وطنية
وانما في عالم الاحتراف يجب ان يكون شعارك هو المصلحة الشخصية
قبل مصلحة الاخرين !

المستر جو .. وحكم الميكي ماوس !!

اخر النكت التي سمعناها علي الصعيد الرياضي العام . والكروي بشكل خاص : هو ذلك الخبر الذي يفيد بان الاتحاد الانجليزي لكرة القدم سوف يتخذ إجراء تأديبي ضد المستر جو كينر مدرب نادي نيوكاسل

فقط لان المستر جو وصف حكم مبارة فريقة امام فولهام في اخر اسابيع الدوري الانجليزي بانه ميكي ماوس !!!

وقد شعر المستر جو بظلم تحكيمي فادح امام فولهام خاصة عندما احتسب الحكم ضربة جزاء ضد فريقة مما دفعه ليقول بالنص :
"كان هناك خطأ شديد الوضوح لمصلحتنا قبل ضربة الجزاء ، ولكن الحكم تجاهله !

ثم كانت الكلمة التي وجعت جنب المسئولين عن الكرة بالاتحاد الانجليزي حيث قال :



"ولم يفعل حكم ميكي ماوس هذا أي شيء لنا. لقد ارتكب خطأ كلفنا الكثير. وهذا هو مستوى التحكيم في هذا البلد. فهذه الأخطاء تتكرر بشكل مستمر. ودائما ما يكون لديهم (الحكام) الإجابة الذكية مثل: أحدهم كان يعيق مجال رؤيتي".

طيب والله هو في بس كام حاجة عايزة يتعلق عليها !

ـــ هي كلمة ميكي ماوس بقت شتيمة ..؟؟! دي أولا !

وبعدين لما مدرب يوصف حكم ظلمه بانه حكم ميكي ماوس يبقي يتجازي ؟؟!! ..طيب لما مدرب زي مانويل جوزية في مصر لما قلع القميص في وسط اللعب امام الجماهير ومحدش كلمه يبقي ده يتسمي ايه !! دي ثانيا ..

خد الثالثة دي : ان المستر جو بيقولك وهذا هو مستوي التحكيم في هذا البلد . !!!!

كمان مرة : هذا هو مستوي التحكيم في هذا البلد .

المستر جو وصف مستوي التحكيم في اقوي دوري في العالم و الدولة المخترعة لكرة القدم بان مستوي التحكيم فيها ضعيف ولا يعجبه !!

اذن السؤال بقي يبقي التحكيم عندنا احنا العرب يبقي عامل ازاي !!

اما رئيس لجنة الحكام المصرية جمال الغندور بيقولك ان التحكيم المصري يعود لنقطة الصفر !!

ولما نتفرج علي مستوي التحكيم في الدوري العام ونشوف الحكام وهما بيوزعو الكروت الصفرا علي المضروبين ويسيبو الضاربين !


اما نشوف حكام الراية وهما قدرتهم علي كشف التسلل .: بالضبط زي قدرة حضرتك كدا علي فهم البالية المائي أو فهم الفلك ..!



عندما يصرح الحكم الدولي ذو الاربعين ربيعا عبد الحكيم العرجون الذي حكم النهائي الافريقي السابق ويخرج بعد المباراة يقول انه ظلم الاهلي وانه بجد أسف وانه كمان بيعتذر عن ادارة وتحكيم المباراة القادمة له ! يبقي ده كله اسمه ايه يا مستر جو ! : فجور تحكيمي مثلا ؟؟ ..

حقيقي مش عارف اقولك ايه يا جدع ! ..

متبطلوا دلع بقي يا شيخ !!!

ألف مبروك لملوك التعصب الكروي ..!!

اذا لم يفعل الاهلي غيرالهزيمة بالاربعة امام باتشوكا المكسيكي في كأس العالم في اليابان فقط ..: لكفاه !
فبعد الحلم الذي تحول الي كابوس ..وبعد ان اصبنا جميعا بخيبة امل رهيبة بعد النتيجة التي خرج بها الاهلي في مباراته
الا ان الان فقط .. تاكدت انه مثلما كانت هناك مساوئ لهزيمة الاهلي : فهناك مكاسب ايضا !
هزيمة الاهلي اكدت لنا ان هناك في مصر ما لا يقل عن نصف مشجعي كرة القدم لا يفهمون في كرة القدم اساسا !
و تحليلات المشجعين باختلاف ميولهم والوان الفرق التي ينتمون اليها اكدت ذلك .. فمرة واحدة اصبح الاهلي فرقة ضعيفة
وان النادي الاهلي نادي تمثيل وادعاءات وبروباجندا اعلامية فجة وابواق وهمية صنعت بطلا من ورق !.. هكذا في لحظة!
وتناسي الجميع ان الفيفا نفسها لفتت انظار العالم كلة باشادتها للنادي الاهلي وتقديرها لمستواه ومجهوداته ونظام ادارته !
الكل اعتبر الاهلي فريق ضعيف وانه علي اعتاب نكسة .. لمجرد فقط اننا في مصر ودونا عن اي بلد اخري في هذا الكوكب لا نعترف الا بالفوز
وعندنا الهزيمة كفر و خروج عن الخط وانهيار مؤكد و انحدار مشدد .!
متناسين ان الكرة مكسب وخسارة وان الرياضة غالب ومغلوب .. وان اي تنافس لابد فيه من فائز ومنهزم ‍!
واذا كان الاهلي اصبح فريقا درجة تالتة بعد الهزيمة .:
فماذا نسمي ريال مدريد الذي خسر بالاربعة من سيفيليا الاسبوع الماضي و هزيمته امس من برشلونة ايضا ؟!
وماذا نسمي الارسنال الذي خسر 5مباريات كاملة و تعادل في اثنتين منذ بداية الموسم !
مأساه في مصر اننا لا نفهم جيدا ما هي مبادئ الرياضة ..فما بالك بممارسة كرة القدم ! .
واذا كنا لا نعرف كيف نمارسها فكيف نحللها ونشجعها ..وكيف نديرها ونجعل منها نظاما متماسكا يصل للاحتراف كما في سائر بلاد العالم !
مأساه ان تكون هزيمة فريق في بطولة يتنافس فيها ابطال القارة !اشبة بكارثة ونكسة كروية في نظر البعض !
ومأساه اخري ان يظهر كثير من الناس علي حقيقتهم ..
وان نري الشماتة في فريق مصر ييمثل مصر في بطولة عمالقة العالم لمجرد انه تخاذل في مباراة - هذا بافتراض التخاذل من لاعبي الاهلي!- ..
ان نري مشجعي الفرق الاخري يطلقون عليه الاحمر.. وهالة .. والجهلي .
ويسبون النادي المنافس وجماهيره ولاعبية ومدربية وادارته و اعلامة وكل ما يمت له بصله ..
ويقزمونه ويضعفون من انجازاته وينعتونها بالفارغة وبالغير مجدية ! ..
أفلا تعتبرون انتم وتنكسفون علي انفسكم و تنظروا الي الكارثة التي تغرقون فيها من رؤوسكم الي أقدامكم !
الكارثة الحقيقية فعلا. والمهزلة حقا لا خيالا . وحقيقة لا كذبا .. !
اخيرا :
الي من يقول علي الاهلي انه نادي القرن ابو قرن صوفي .
فقط لايسعنا الا ان نقول ان هناك اندية تخصصت في منهجية الفوز واصطياد البطولات
وان تصل باسماء لاعبيها الي العالمية ليصبح ناديها نادي عالمي !
وهناك اندية اخري تخصصت في الفشل والخسارة
واصبح الهم الاكبر ان تنكرها وان لم تعرف فأنها تبررها ..حتي يصبح النادي منهم بطلا في الفشل..
يصبح فاشل عالمي ..!

صباع الخير يا أجوجو !!

اخر ماتش للزمالك في الدوري العام وبالتحديد ماتش بتروجيت ..شهد مشهدا صارخا وعنيفا كاننا بنتفرج علي احد افلام الام بي سي أكشن ! وهو عندما اشار السيد المحترم .. اللاعب المحترف . الغاني الجنسية .. والسوقي الشخصية ! .. الأخ جونيور أجوجو بصباعه في حركة سوقية للاعب بتروجيت حسستنا كأننا في مسمط درجة تالتة في حي اسطبل عنتر مثلا !
وفي خضم الاحداث الكروية الافريقية حيث اتلخم الكل في مباراة الاهلي النهائية . تناسي الجميع ما حدث من اللاعب وتغافلو عن مهزلة كروية وأخلاقية تشهدها الملاعب . ومحطة اخري من محطات الفشل يبلغها لاعب من لاعبي الزمالك !
كما ان المخرج المحترم ( مخرج المباراة ) ما صدق الراجل وكانه لقي لقية او فلوس في الأرض .فتابع اعادة اللقطة مرة بعد أخري كانه بينبهنا علي انه مخرج ممتاز وانه مبيفوتش لحظة ( مع الاعتذار لفودافون ! ) .
وبعيدا عن التحدث علي نية المخرج من إعادة اللقطة كذا مرة . الا انها تعتبر اقرارا بما حدث وتثبيتا للتهمة علي اللاعب .وبغض النظر عن مشاكل الزمالك المتتالية والقرارات التأديبية المتوالية . فلابد ايضا من اتخاذ اجراء ضد اللاعب ولا يهم اي طرف من الاطراف .سواء الادارة او الاتحاد او الجماهير او حتي اللاعب نفسه .
ولنساويه بعمرو ذكي عندما بدر منه لفظ معين حوسب عليه .. وشيكابالا عندما تم ايقافة بعد رفعة الجزمة الشهيرة ! وسمير كمونة قبل اعوام عندما اشار بيدية بنفس حركة الصباع .
غير ان هاجسا ما يقول لي ان حركة الصباع دي بالذات وفي الزمالك بالذات بالذات هتعدي ! ولنتذكر كلنا مباراة ال 6 / 1 الشهيرة عندما اشار ابراهيم حسن بنفس الحركة .. وبنفس الصباع .. ولم يوجد وقتها من يتصدي للاعب او ينبه المسئولين لخطر التغافل عن اعطاءه احد العقوبات .
فقط نتمني ان لا تتصرف ادارة اتحاد الكرة كما تصرفت مع ابراهيم سعيد منذ فترة عندما ارتكب اللاعب فعلا فاضحا مع احمد عبد الحكم لاعب المنصورة وتم تصويرها وتم الكتابة عندها مع الصور بالاهرام الا ان لجنة المسابقات وقتها برئاسة الحاج : محمود السيد رفضت توقيع اي عقوبة علي اللاعب ! مهزلة طبعا !
عدم اتخاذ قرارات منذ البداية ( مباراة ال 6 / 1 مثلا ) هي التي اوصلت لاعبي الدوري لهذه المرحلة .. حيث اصبح شعارهم ( ولا ايقاف بيهدني .. ولا مخالفة تلمني ! )
فمن سمير كمونة لابراهيم حسن لحسام حسن لابراهيم سعيد لمحمد ابو العلا لجونيور مهاجم الزمالك السابق لأجوجو ابو صباع ..!
اذن لا تستغربوا اذا وجه احد لاعبي الدوري صباعه لوجه احد الحكام بعد ذلك واذا حد كلمه فمش هيقول غير كلمة واحدة :
هو اجوجو احسن مني ؟ .. ولا هو ب 6 صوابع وانا لأ مثلا ؟؟!!